fbpx
Connect with us

የደም ግፊት ህመም ምንድነዉ?

featured image

ህክምና

የደም ግፊት ህመም ምንድነዉ?

ደም በሰዉነታችን የደም ዝዉዉር ስዓት ዉስጥ ከልብ ወደ ሌሎች የሰዉነት አካላት እንዲሰራጭ በደም ስሮች ዉስጥ መጓዝ አለበት። በዚህም ደግሞ ከልብ በሚነሳ የግፊት ሃይል በደም ስሮቹ ዉስጥ ይጓዛል። በዚህም ሂደት በደም ስሮቹ ዉስጥ የተወሰነ ግፊት ወይም pressure ይፈጠራል። ይህ ግፊት በተፈጥሮ ካለዉ በላይ በመሆን ከፍ ሲል የደም ግፊት ህመም ተብሎ ይጠራል።

የደም ግፊት ተለክቶ የሚገለጸዉ በሁለት ቁጥሮች ሲሆን፣ የመጀመሪያዉ (Systolic) የምንለዉ የሚለካዉ ልብ ደም በሚገፋበት ወይም በሚኮማተርበት ወቅት የሚፈጠረዉ ግፊትን ነዉ። ሁለተኛዉ (Diastolic) የምንለዉ ልብ በሚያርፍበት ጊዜ በደም ስሮች ዉስጥ የሚፈጠረዉን ግፊት መለኪያ ነዉ። የደም ግፊት ህመም ተብሎ የሚጠራዉ ደግሞ የመጀመሪያዉ የደም ግፊት(Systolic) 140 እና ከዚያ በላይ ሲሆን ወይም/እና ሁለተኛዉ የደም ግፊት መለኪያ(Diastolic) 90 እና ከዚያ በላይ ሚሊ ሜትር ኦፍ ሜርኩሪይ ሲሆን ነዉ። ከሁለቱ መለኪያዎች አንዱ ከመጠኑ በላይ ከሆነ የደም ግፊት ህመም ተብሎ ይጠራል።

እንደ አለምጤና ጥበቃ ድርጅት መረጃ መሰረት በአለማችን ላይ ከ 1.2 ቢሊየን በላይ ሰዎች የደም ግፊት ህመም ያለባቸዉ ሲሆን ቢያንስ ከ አራቱ ሰዎች አንዱ በህመሙ ተጠቂ ነዉ። ህመሙ ካለባቸዉ ሰዎች ደግሞ ከ 80 በመቶ በላይ የሚሆኑቱ በትክክል ህክምና ያላገኙ እና የደም ግፊታቸዉ በቁጥጥር ስር አልሆነም። ይህ ህመም ከጥቂት አስርት አመታት በፊት ያደጉ ሀገራት ላይ ብቻ በስፋት የሚታይ ችግር ቢሆንም አሁን ግን በማደግ ላይ ያሉትም ሀገራት ላይ ያሉ ህዝቦች ላይ ቁጥሩ እጅግ እየበዛ መጥቷል። በትክክል ህክምና እና ክትትል ያልተደረገበት የደም ግፊት ህመም ሰዉነትን በተለያዩ መንገዶች ማለትም ልብ፣ አንጎል፣ እና ኩላሊትን በዋናነት በመጉዳት ለሌሎችም ህመሞች መንስኤ ሊሆን ይችላል።

የህመሙ ምልክቶች ምንድናቸዉ?
ከህመሙ ተጠቂዎች መካከል አብዛኛዎቹ ሰዎች ህመሙ እንዳለባቸዉ ሳያውቁ ለረጅም ጊዜ ይቆያሉ። ይሄም ደግሞ ህመሙ ለረጅም ጊዜ በመቆየቱ የተለያዩ የሰዉነት ክፍሎችን በመጉዳት እና ለተለያዩ ህመሞች መንስኤ ከሆነ በኋላ ህክምናዉን ከባድ ያደርገዋል።
ከምልክቶቹ መካከል፡- ከእንቅልፍ ሲነቃ ያለ ራስ ምታት፣ የአፍንጫ በተደጋጋሚ መድማት፣ የልብ ምት መዛባት፣ የእይታ ለዉጥ ወይም ብዥታ፣ የጆሮ ዉስጥ ጩኸት ይገኙበታል። ህመሙ ከበድ እያለ ሲመጣ ደግሞ ድካም፣ ማቅለሽለሽ፣ ማስመለስ፣ መወዛገብ፣ ጭንቀት፣ የደረት ህመም እና የሰዉነት መንቀጥቀጥ ምልክቶች ይገኙበታል። ሳይታከም የቆየዉ ደግሞ ለ ኩላሊት መድከም፣ለስትሮክ፣ ለልብ ድካም፣ ለድንገተኛ የልብ ስራ ማቆም እና ለድንገተኛ ሞት ሊዳርግ ስለሚችል ዝምተኛዉ ገዳይ በመባልም ይታወቃል።

የደም ግፊት ህመም ምርመራ
የደም ግፊት ህመም መኖር ያለመኖሩን በቀላሉ በቤት ዉስጥ የደም ግፊት በመለካት ማወቅ የሚቻል ቢሆንም ከፍ ያለ ግፊት በሚኖርበት ጊዜ ሌሎች የሰዉነት አካላት መጎዳት ያለመጎዳታቸዉን ለማወቅ የተለያዩ ምርመራዎችን በህክምና ስፍራ በመሄድ ማድረግ ተገቢ ነዉ።
ለጥያቄ፣ አስተያየት ወይም ለማማከር በኮሜንት ሳጥን ያስቀምጡልኝ።
አመሰግናለሁ።

MD, Lecturer, UX & UI Developer, Consultant SMM, and Blogger.

Click to comment

More in ህክምና

To Top